電子遊戲在呢個世代有幾令人著迷，睇怕都唔使多講。可惜小弟唔好打機，所以07年三大次世代遊戲機我一部都冇諗過有。當然，生於電子世代的我，點都會有一兩次唔理借好屋企人買好，感受過電子遊戲的魔力，不過只此三兩下接觸，毒癮唔算深(都好彩唔深)。
昨日在朋友盧氐家中替朋友 J 補祝生日，晨早約好到佢家中，諗住吹吹水打發時間等 J 放工慶祝食飯，想唔起屋主買了次世代 WII 遊戲機，哈，被譽為合一家大小玩樂的遊戲機果然名不虛傳，單單三兩個遊戲，就可以令我們玩足大半日。好玩在次世代發明─體感遊戲，遊戲簡單，但如果話一上手寫包單冇甩拖，噢，又唔係個個得，就係咁大家玩下笑下，青春就咁不知不覺間又走了。
因為少玩遊戲，所以好少有非常非常希望有部遊戲機在家看門口，今次真的不能不服任天堂，遊戲唔複雜，但要周身郁至可以玩遊戲，真係增加了不少樂趣。搞到我都心郁，妖~~~XDXD
溫馨提示：遊戲都要講技巧，唔係真係搞到隻手好酸痛格~~^O^
神經影片，假多過真，不過人應該有少少阿Q，等我有部iphone就用部二奶mini做實驗。haha
錫紙自製喇叭
http://www.youtube.com/watch?v=8m8fbnShPcw
３Ａ電芯開電話
http://www.youtube.com/watch?v=0rA-zhTJuFU
妙絕，「錫紙自製喇叭」仲有 update 版添!
http://www.youtube.com/watch?v=3IYoxyKJhHM
張相如何呢？坐在草地球場上睇表演我印象中係第一次，幾唔習慣比幾支球場燈照住，我同同行朋友打趣話好似入了集中營，您話似唔似先？
禽日下午先聽完一個廣告講座，照上個星期時間睇，我係應該趕唔倒集合時間跟住聽耶穌(葛福臨)的，噢，點知真係估佢唔到，準時放人(心諗如果真係遲放，通知聲唔去算啦)。結果同另外幾個朋友就聽了呢個佈道會，睇來大家都低估了教徒的威力，身為教徒的朋友R已經好醒咁預早約好，點知都係唔夠其他教徒神心，第一會場座滿，我們要到第二會場坐草地，仲要個screen都幾集中！好彩我唔係信徒，唔係睇得一定唔高興。
決志的時刻(報道會尾聲指定動作)，有位教友好好心地咁問我做咩唔出去，猶豫什麼，唔，我下意識就回敬佢一句"我冇猶豫喎"，當堂冇癮(我話佢呀！大概佢冇諗過有人比呢個答案佢掛)。我從來唔覺得一定要有咩需求(或者會信教)至要來聽講道，至少同行的其他朋友歸此類啦，所以呢位教友意識咁諗，某程度係幫耶穌倒米的。當然我明咁樣一句到尾都幾唔好的，所以都要講句sorry！
應該好多人都有睇警訊，叫您小心陌生人在街上問路人要錢。雖然未必要您好多錢，但如果真係幫到人，其實都係小問題。
今晚，我就做了主角。真係比一個聲稱在內地做生意的人問我借錢(正確係問我要錢，不過佢一再強調唔係問我討飯錢)，您會點樣決定呢？我當時反而在諗，您真係算一個倒霉的人，雖然商場夜麻麻唔算好多人，都有三兩丁呀，您竟然搵著我呢個無業中年借錢，真係注定您要行衰運了。(假設佢講的都係真)
喂，一開口就問我借錢住酒店？您唔係真係當香港人個個係李家誠嘛？莫講話我好少有咁多錢在身啦，就算有，都唔可能咁樣借比您啦？！您真係太睇得香港人的善心了。結果在討價還價之後，由住酒店到只係要車錢番深圳再........咳咳，在我估計就算做了警訊主角之類的傻事都蝕底有限之下(而且可能佢真係有需要呢)，我還是有借的，至於金額就唔好講，因為真係好少好少.......
至於呢件係咪傻事呢，以我所見，呢位內地人講說話都有紋路，而且佢又冇諗住搶我銀包的意圖，再者我給了果少少錢比佢，雖然失望但冇反老皮，唔，呢件傻事做得過！
唔好問我點解堂堂一個老闆會乜咭物咭都冇要輪落街頭(事實我有朋友真係乜咭都冇，死未？！)，又唔好問我點解佢唔搵警察幫手(我估警察極其量帶佢番警署坐，應該唔包一餐及送佢一程掛)。所以呢，如果下次主角係您，執生呀！
早認命自己唔係咩有抽獎運的人，所以期期六合彩都係中一個字。
估唔到今日去參加講座，好lucky咁又比我抽倒套軟件喎，感謝神呀！
(亂諗一下：唔知係咪暗示我要轉行呢？)
PS：其實呢，如果呢，送個"分光儀"比我會開心更多更多囉。不過軟件我都好心足咯。
一連三日的替工生活終於完成，在舊公司個人真係懶了很多，一去到新環境做事真係老鼠拉龜，我諗如果唔係朋友一早通了少少水，睇怕一開始就令佢同公司背鑊，好彩都在好趕好趕的情況下完成，鬆一口氣。XDXD
星期四原本以為一樣有常規工作要做，點知冇喎，心想一定覺得我手腳慢，所以搵其他同事做啦，原來果日係冇得搞格喎，胡思亂想！:)
好了，你話我大鄉里都係咁話，從前老細係孤寒鬼，所有工作科技都係上世紀工具，來到呢間公司所有工具都比以前先進(至少，係至少都比以前好啦)，真係工作都順暢D啦，噓~~
另一樣係以前做artwotk都係冇標準，少有(其實係冇)為一D要睇guideline的公司做artwork，都..............................................幾煩！XDXD
其實短期替工，最大得著係pick up番少少工作節奏，nice~~
小弟揀禮物送比朋友一向都有一個大原則──美觀同實用。ok，就算唔靚仔都要實用，如果送一個禮物給朋友而對方又用唔著的話，我會選擇唔送的！
所以為免臨時臨急揀錯或揀唔到禮物，一般都會早幾日，嘿嘿，對！係幾日前開始四出搵合心水禮物。
昨日朋友w生日食飯，為免今年又冇禮物送俾佢的關係，本來己有心水選擇，不過臨門一腳出事，結果快快入了沙田臨時補飛。好在朋友jj有一點求其又有一點好彩，在一間舖頭睇中一個銀包，唔......當一件事失去預算時，對某類事我的要求是可以降低的。而且個銀包樣都唔差喎，又實用，再重要係fit朋友jj的預算嘛。好，去馬。
席間朋友w想要埋同系列的散紙包，我想朋友jj的選擇是對的。下年生日禮物可以少煩惱咯。^^
